યા કુન્દેન્દુ- તુષારહાર- ધવલા યા શુભ્ર- વસ્ત્રાવૃતા
યા વીણાવરદણ્ડમન્ડિતકરા યા શ્વેતપદ્માસના |
યા બ્રહ્માચ્યુત- શંકર- પ્રભૃતિભિર્દેવૈઃ સદા પૂજિતા
સા માં પાતુ સરસ્વતી ભગવતી નિઃશેષજાડ્યાપહા || ૧||
દોર્ભિર્યુક્તા ચતુર્ભિઃ સ્ફટિકમણિમયીમક્ષમાલાં દધાના
હસ્તેનૈકેન પદ્મં સિતમપિ ચ શુકં પુસ્તકં ચાપરેણ |
ભાસા કુન્દેન્દુ- શંખસ્ફટિકમણિનિભા ભાસમાનાઽસમાના
સા મે વાગ્દેવતેયં નિવસતુ વદને સર્વદા સુપ્રસન્ના || ૨||
આશાસુ રાશી ભવદંગવલ્લિ
ભાસૈવ દાસીકૃત- દુગ્ધસિન્ધુમ્ |
મન્દસ્મિતૈર્નિન્દિત- શારદેન્દું
વન્દેઽરવિન્દાસન- સુન્દરિ ત્વામ્ || ૩||
શારદા શારદામ્બોજવદના વદનામ્બુજે |
સર્વદા સર્વદાસ્માકં સન્નિધિં સન્નિધિં ક્રિયાત્ || ૪||
સરસ્વતીં ચ તાં નૌમિ વાગધિષ્ઠાતૃ- દેવતામ્ |
દેવત્વં પ્રતિપદ્યન્તે યદનુગ્રહતો જનાઃ || ૫||
પાતુ નો નિકષગ્રાવા મતિહેમ્નઃ સરસ્વતી |
પ્રાજ્ઞેતરપરિચ્છેદં વચસૈવ કરોતિ યા || ૬||
શુદ્ધાં બ્રહ્મવિચારસારપરમા- માદ્યાં જગદ્વ્યાપિનીં
વીણાપુસ્તકધારિણીમભયદાં જાડ્યાન્ધકારાપહામ્ |
હસ્તે સ્પાટિકમાલિકાં વિદધતીં પદ્માસને સંસ્થિતાં
વન્દે તાં પરમેશ્વરીં ભગવતીં બુદ્ધિપ્રદાં શારદામ્ || ૭||
વીણાધરે વિપુલમંગલદાનશીલે
ભક્તાર્તિનાશિનિ વિરિંચિહરીશવન્દ્યે |
કીર્તિપ્રદેઽખિલમનોરથદે મહાર્હે
વિદ્યાપ્રદાયિનિ સરસ્વતિ નૌમિ નિત્યમ્ || ૮||
શ્વેતાબ્જપૂર્ણ- વિમલાસન- સંસ્થિતે હે
શ્વેતામ્બરાવૃતમનોહરમંજુગાત્રે |
ઉદ્યન્મનોજ્ઞ- સિતપંકજમંજુલાસ્યે
વિદ્યાપ્રદાયિનિ સરસ્વતિ નૌમિ નિત્યમ્ || ૯||
માતસ્ત્વદીય- પદપંકજ- ભક્તિયુક્તા
યે ત્વાં ભજન્તિ નિખિલાનપરાન્વિહાય |
તે નિર્જરત્વમિહ યાન્તિ કલેવરેણ
ભૂવહ્નિ- વાયુ- ગગનામ્બુ- વિનિર્મિતેન || ૧૦||
મોહાન્ધકાર- ભરિતે હૃદયે મદીયે
માતઃ સદૈવ કુરુ વાસમુદારભાવે |
સ્વીયાખિલાવયવ- નિર્મલસુપ્રભાભિઃ
શીઘ્રં વિનાશય મનોગતમન્ધકારમ્ || ૧૧||
બ્રહ્મા જગત્ સૃજતિ પાલયતીન્દિરેશઃ
શમ્ભુર્વિનાશયતિ દેવિ તવ પ્રભાવૈઃ |
ન સ્યાત્કૃપા યદિ તવ પ્રકટપ્રભાવે
ન સ્યુઃ કથંચિદપિ તે નિજકાર્યદક્ષાઃ || ૧૨||
લક્ષ્મિર્મેધા ધરા પુષ્ટિર્ગૌરી તૃષ્ટિઃ પ્રભા ધૃતિઃ |
એતાભિઃ પાહિ તનુભિરષ્ટભિર્માં સરસ્વતી || ૧૩||
સરસવત્યૈ નમો નિત્યં ભદ્રકાલ્યૈ નમો નમઃ
વેદ- વેદાન્ત- વેદાંગ- વિદ્યાસ્થાનેભ્ય એવ ચ || ૧૪||
સરસ્વતિ મહાભાગે વિદ્યે કમલલોચને |
વિદ્યારૂપે વિશાલાક્ષિ વિદ્યાં દેહિ નમોસ્તુ તે || ૧૫||
યદક્ષર- પદભ્રષ્ટં માત્રાહીનં ચ યદ્ભવેત્ |
તત્સર્વં ક્ષમ્યતાં દેવિ પ્રસીદ પરમેશ્વરિ || ૧૬||
|| ઇતિ શ્રીસરસ્વતી સ્તોત્રં સંપૂર્ણં||
